Idalia konsiderohet uragani më i fuqishëm që ka goditur rajonin veriperëndimor të Shteteve të Bashkuara të Amerikës në më shumë se një shekull. Raportohen shkatërrime në shkallë të konsiderueshme dhe megjithëse fuqia e uraganit është dobësuar sërish mbetet "i rrezikshëm. Uragani Idalia goditi fillimisht Floridën dhe më pas u drejtua për në Gjeorgji dhe Karolinën e Jugut. Idalia u përcaktua fillimisht e kategorisë tre në Florida duke pasur një shkallë të lartë stuhie, me erëra 125 milje për orë. Uragani ra në kategorinë e dytë kur mbërriti në Gjeorgji, dhe e uli edhe më shumë intensitetin në Karolinën e Jugut. Përmbytje të mëdha u raportuan në Florida, ndërsa deri në 25 centimetër shi ra në pjesë të Gjeorgjisë. Baticat e larta pritet të përkeqësojnë kushtet klimaterike. Pemë u rrëzuan, duke bllokuar rrugët dhe më shumë se 310,000 shtëpi mbetën pa energji në të gjithë Floridan dhe Gjeorgjinë. Të dyja shtetet, si dhe Karolina, shpallën gjendjen e jashtëzakonshme. Dy vdekje u raportuan nga policia në Florida si rezultat i aksidenteve të lidhura me motin. Më shumë se 850 fluturime u pezulluan dhe disa aeroporte u mbyllën. Garda kombëtare e Floridës mobilizoi rreth 5,500 ushtarë dhe avionë për të kryer operacionet e shpëtimit dhe pastrimit të rrugës. Presidenti i Shteteve të Bashkaura të Amerikës Joe Biden u shpreh se tashmë askush nuk mund të mohojë ndikimin krizës klimatike. “Përmbytjet historike, thatësirat intensive, nxehtësia ekstreme, zjarret e mëdha kanë shkaktuar dëme të konsiderueshme siç nuk i kemi parë kurrë më parë”, u shpreh Biden.