Për herë të parë që nga vendimi i Gjykatës së Tiranës dhënë më 25 mars, që regjistron statutin e ri të Partisë Demokratike, të votuar në Kuvendin Kombëtar të 11 dhjetorit, Enkelejd Alibeaj ka thirrur mbledhjen e grupit parlamentar. Mbledhja do të zhvillohet të enjten në orën 09.00 të mëngjesit, para se të nisë seanca plenare në Kuvendin e Shqipërisë. Mbledhja para seancës parlamentare, është rutinë dhe ka si rend dite qëndrimin e zyrtar që forca politike do të mbajë në atë seancë, por kjo mbledhje pritet të ketë edhe zhvillime të tjera, pasi duhet theksuar se është e para që nga vendimi i Gjykatës dhe mund të ketë të pranishëm edhe deputetët, pjesë e Komisioni të Rithemelimit. Ky i fundit me vendimin e gjykatës është zyrtarisht edhe grupi që drejton aktualisht PD-në. Po ashtu mbetet për tu parë nëse në këtë mbledhje grupi do të jetë i pranishëm Lulzim Basha, i cili zyrtarisht është vetëm një deputet i thjeshtë i Partisë Demokratike. Basha menjëherë pas dorëheqjes ka nisur një tur takimesh në bazë, që në dukje ngjason me lëvizjen e ish-kryeministrit Berisha. Kujtojmë se Komisioni i Rithemelimit i ka kërkuar vazhdimisht Alibeajt që të thërrasë një mbledhje të përbashkët të grupit parlamentar të PD, për të dialoguar për bashkimin e demokratëve. Ndërkohë Alibeaj ka animuar vendimin e gjykatës për regjistrimin e statutit të ri të PD. Nga ana tjetër, Gazment Bardhi ka depozituar në SPAK një kallëzim ndaj gjyqtarit Agron Zhukri, i cili regjistroi statutin e ri të PD.