Shqipëria po shkon drejt raundit të katërt të votimeve ku tashmë stafetën për zgjedhjen e presidentit e ka Partia Socialiste. Këtë të martë, në ambientet e kryesisë së kuvendit, do të mblidhet konferenca e kryetarëve, që do të vendosë përballë politikanët e mazhorancës dhe opozitës. Të dyja krahët e politikës, i dogjën njëra pas tjetrës tre mundësitë e konsensusit, herë me marrëveshje dhe letra e herë me mosdakordësi dhe deklarata publike. Në rend të ditës të konferencës së kryetatëve, qëndron caktimi i datës, kur Kuvendi do të çelë punimet e seancës së katërt plenare për votimin e kandidaturave për president. Kreu i grupit parlamentar të Partisë Socialsite, Taulant Balla deklaroi se do të zbatohen afatet maksimale kushtetuese, shtatë ditore. Në përputhje me klauzolat e kushtetutës pritet të propozohet data 6 qershor.