Policia e Shtetit njoftoi se përgjatë të enjtes pritet riatdhesimi në Shqipëri i Durim Bamit, i shumëkërkuari nga drejtësia shqiptare për disa akuza të rënda të ngritura ndaj tij nga ana e Prokurorisë së Posaçme. Bami është ndaluar prej disa kohësh në Emiratet e Bashkuara Arabe. Ndaj 47 vjeçarit, Gjykata e Posaçme ka caktuar masën e sigurisë arrest me burg për sigurim kushtesh për të kryer vrasje, grup të strukturuar kriminal, kultivim droge dhe vepra penale të kryera në kuadër të grupit të strukturuar kriminal. Durim Bami del në përgjimet Sky dhe Encrochat si një prej organizatorëve të tentativës për të ekzekutuar Arben Ndokën, ish deputet i Partisë Socialiste. Sipas përgjimeve, Durim Bami ka bashkëpunuar me Xhelal Rrajën, vëllain e ish deputetit tjetër të PS, Rrahman Rraja për të ekzekutuar Arben Ndokën. Përgjimet zbulojnë se ekzekutimi i Arben Ndokës lidhej me hasmërinë e vjetër mes tyre, pasi ish deputeti i Qarkut të Lezhës kishte bërë disa tentativa për të eliminuar Durim Bamin, që e akuzonte se ishte i përfshirë në vrasjen e vëllait të tij, Aleksandër Ndoka.