Drejtori i Përgjithshëm i Objekteve Publike në Bashkinë e Tiranës, Feti Fanaj, ka ndërruar jetë sot në moshë fare të re. Fanaj ishte infektuar me Covid 19 e ishte dërguar për kurim drejt Turqisë, por fatkeqësisht, nuk ka mundur ta fitojë betejën për jetën. Shumë miq të zyrtarit që lë pas bashkëshorten dhe një vajzë të vogël, kanë përcjellë ngushëllimet për të në rrjetet sociale. Të njëjtën gjë bëri dhe kryetari I bashkisë së Tiranës Erjon Veliaj, I cili foli për për një mik të rrallë dhe një njeri që do të kujtohet gjithmonë si mjaft punëtor. "Fetiu ishte një mik ideal, një baba i jashtëzakonshëm i Mishelit të vogël. Nga ata njerëz punëtorë që i dha kaq shumë Tiranës, kuronte çdo ditë, me po të njëjtin pasion, çdo detaj të shkollave, kopshteve dhe çerdheve tona publike. I kudogjendur, i palodhur! U prehsh në paqe i dashur Feti, vëlla i pazëvendësueshëm për të gjithe ne! Ngushëllime Nidës së re e nënës së tij hallemadhe, që sapo humbi edhe të shoqin. Nuk do t'ju lëmë kurrë vetëm", ka shkruar kryebashkiaku.