Një aksident me dëme materiale ka ndodhur mbrëmjen e kësaj të marte në qendër të Fierit. Drejtuesi i një automjeti tip Porsche, i identifikuar si Arbër Imeraj, duke lëvizur me shpejtësi tej normave të lejuara pasi nuk iu bind urdhrit të Policisë për të ndaluar, humbi kontrollin mbi drejtimin e mjetit dhe përplasi dy automjete të parkuara në qendër të qytetit, duke i dëmtuar rëndë ato. Ndërkohë, është raportuar se shkaktari i aksidentit është person me precedent të mëparshëm penal dhe se sapo është liruar nga qelia. Sipas dëshmitarëve në vendngjarje, pas aksidentit drejtuesi i mjetit Arbër Imeraj ka tentuar të largohet, madje ka hequr edhe targën e automjetit për të shmangur identifikimin. Ka qenë ndërhyrja e disa qytetarëve, të cilët e kanë penguar të largohej, si dhe reagimi i shpejtë i një patrulle policie që ndodhej pranë zonës, çka bëri të mundur neutralizimin dhe prangosjen e tij. Drejtuesi i mjetit është shoqëruar në komisariat për veprime të mëtejshme, ndërsa në vendngjarje shërbimet e policisë kryen kontrollin e automjetit, ndërkohë që hetimet vijojnë për të bërë të mundur zbardhjen e plotë të shkaqeve dhe rrethanave të aksidentit.