Një 26 vjeçar është arrestuar nga policia e Lezhës teksa u ndalua gjatë drejtimit të automjetit pa leje drejtimi. I riu është ndaluar rreth mesditës nga shërbimet operacionale të sigurisë rrugore në qarkun e Lezhës. Gjatë verifikimeve, efektivët vunë re se i riu po drejtonte automjetin, edhe pse ndaj tij kishte në fuqi një masë për heqjen e lejes së drejtimit. Kur u njoh me këtë fakt, 26 vjeçari kundërshtoi urdhrin e policisë për ta shoqëruar drejt komisariatit dhe tentoi të largohej me automjet, duke rrezikuar jetën e efektivëve të policisë. Në këto kushte, policia thotë në njoftim se njëri prej efektivëve ka qëlluar me armën e shërbimit drejt gomave të automjetit, duke bërë të mundur ndalimin e tij. Gjatë kontrollit në automjetin e të riut u gjet edhe një armë e ftohtë, ndërsa policia thotë se referoi në prokurori rastin ndaj 26 vjeçari me tre akuza penale, përfshirë këtu edhe atë të kundërshtimit të punonjësit të policisë. Paralelisht me këtë, rasti po verifikohet edhe nga Agjencia për Mbikëqyrjen Policore nëse ka tejkalim kompetencash dhe force nga ana e efektivit të policisë së shtetit.