Dy fortesa mesjetare përballen me njëra-tjetrën përtej lumit Narva që ndan Estoninë nga Rusia, në skajin lindor të Evropës. Dikur një simbol i bashkëpunimit, "Ura e Miqësisë" që lidh dy brigjet e mbuluara me borë është përforcuar me rreshta telash me gjemba dhe pengesa antitank të njohura si "dhëmbë dragoi" në anën estoneze. Shumëkush druan se qyteti kufitar me mbi 50,0000 banorë, një përzierje estonezësh, rusësh dhe njerëzish të mbetur pa shtetësi pas rënies së Bashkimit Sovjetik, mund të jetë objektivi i ardhshëm i Vladimir Putinit. Në anën estoneze të urës, flamuri i NATO-s valëvitet në erë pranë atyre të Estonisë dhe Bashkimit Evropian. Njerëzit në makina dikur prisnin në radhë për të kaluar lumin Narva për të bërë pazar dhe për të parë të afërmit në Rusi. Por sot kalimi është i mbyllur për trafikun dhe udhëtarët tërheqin bagazhet e tyre në këmbë. Ndërsa lufta e Moskës kundër Ukrainës i afrohet përvjetorit të katërt, atmosfera në Narva është e zymtë.