Termometri pritet të shënojë këtë të mërkurë vlerën maksimale deri në 41 gradë Celsius. Sakaq, i gjithë territori i Shqipërisë do të ndikohet nga kushte atmosferike të qëndrueshme dhe të nxehta. Shërbimi meteorologjik ushtarak ka njoftuar se moti parashikohet i kthjellët në të gjithë territorin si dhe vranësira të pakta kalimtare në orët e mesditës. Era do të fryjë kryesisht nga kuadrati i perëndimit dhe shpejtësi mesatare 2-7 m/sek, ndërsa përgjatë vijës bregdetare e zonave luginore era fiton shpejtësi deri në 8-10m/sek. Teksa i nxehti afrikan vijon, sipas shërbimit meterologjik edhe pjesa tjetër e javës vendi ynë do të ndikohet nga kushte të qëndrueshme atmosferike si rezultat i depërtimit të masave ajrore të nxehta me origjinë jugore si dhe depërtimit të aktivitetit të Anticiklonit Afrikan. Përgjatë vijës bregdetare e zonave luginore në momentin e zhvillimit të vranësirave era fiton shpejtësi deri në 10-13 m/sek, ndërsa valëzimi në dete 1-3 ballë.