Më shumë se 450 persona kërkuan trajtim spitalor për probleme që lidhen me nxehtësinë në një ditë të vetme në Tokio, numri më i lartë që nga fillimi i regjistrimit të të dhënave 16 vjet më parë, thanë shërbimet e emergjencës të enjten. Shifra u publikua ndërsa Japonia u përfshi nga një valë të nxehti që ka vrarë të paktën 14 persona gjatë javës së kaluar. Një total prej 453 personash morën trajtim spitalor për probleme që lidhen me nxehtësinë të mërkurën, numri më i madh që nga fillimi i regjistrimeve në vitin 2010, tha Departamenti i Zjarrfikësve të Tokios. Telefonatat e emergjencës ishin gjithashtu në nivelin më të lartë që nga viti 1963. "Ne po i nxisim njerëzit të qëndrojnë të hidratuar dhe të përdorin kondicionerë", tha një zëdhënës i zjarrfikësve. Në prefekturën e Tokios, që mban rreth 14 milionë njerëz, një person humbi jetën në valën aktuale të të nxehtit, katër të tjerë janë në gjendje kritike dhe 18 në gjendje të rëndë. Për turistët, i nxehti është i padurueshëm. "Ne i kemi planifikuar udhëtimet tona duke u përpjekur të sigurohemi që mund të kalojmë kohë në metro për t'u freskuar, duke gjetur dyqane të vogla me ajër të kondicionuar për të blerë ndonjë suvenir, duke bërë gjithçka që mundemi për të qëndruar të freskët", thotë një turist amerikan, 35 vjecar. "Por veçanërisht me fëmijët më të vegjël, ka qenë absolutisht brutale", shton ai. Agjencia e Menaxhimit të Zjarrfikësve dhe Fatkeqësive e ka quajtur valën e të nxehtit një "katastrofë".Të enjten, të paktën gjashtë rajone përjetuan temperatura 40°C ose më të larta ndërsa. Vendi më i nxehtë ishte Hamamatsu në rajonin qendror Shizuoka me 41.1°C. Ai u pasua nga qyteti Toyota - selia e gjigantit të makinave - në rajonin fqinj Aichi me 40.8°C dhe Kuëana me 40.7°C. Temperatura më e lartë e regjistruar ndonjëherë në Japoni i takon 5 gushtit 2025, kur mërkuri në termometër u ngrit në 41.8°C në Isesaki, në veri të Tokios. Japonia prezantoi këtë vit një term të ri për të përshkruar nxehtësinë mbi 40°C të quajtur "kokushobi", që përkthehet si "ditë mizore e nxehtë".