Partia Demokratike ngre akuza për mënyrën se si është financuar shërbimi i hemodializës në Shqipëri, duke iu referuar dokumenteve të Kontrollit të Lartë të Shtetit dhe Fondit të Sigurimit të Detyrueshëm të Kujdesit Shëndetësor. PD pretendon se paralelisht me koncesionin mbi 93 mln euro shteti ka vijuar të financojë hemodializën edhe në struktura private. Pikëpyetjet e opozitës lidhen edhe me mënyrën e përzgjedhjes së ofruesve privatë. Vangjeli citon auditimin e KLSH-së, sipas të cilit kontratat me spitalet jopublike gjatë viteve 2020–2022 janë lidhur drejtpërdrejt, pa procedura prokurimi. PD kërkon nga qeveria dhe Fondi I Sigurimit të Detyrueshëm të Kujdesit Shëndetësor transparencë mbi mënyrën e financimit dhe përzgjedhjes së ofruesve privatë, si dhe sqarime mbi mekanizmat e kontrollit që garantojnë se nuk ka pasur pagesa të dyfishta për të njëjtin shërbim.