Gjykata e Tiranës ka dënuar me 35 vite burg për ish gardistin Alket Arapaj, i cili shpallet fajtor për vrasjen e bashkëshortes së tij Evelina Seferaj. Ngjarja tragjike ndodhi dy vite më parë, me 12 shkurt të vitit 2019 në zonën e Allias-it në Tiranë. Ish Gardisti qëlloi me armën e shërbimit bashkëshorten e tij duke e lënë atë të vdekur në vend dhe shkak i krimit të rëndë ishte xhelozia. Ishin fqinjët që pas krimit lajmëruan policinë, pasi dëgjuan të shtënat me armë zjarri dhe fëmijën e mitur të çiftit duke qarë. Në kohën e arrestimit, ish gardisti nuk bëri rezistencë. Arapaj akuzohej për “Vrasje për shkak të marrëdhënies familjare”. 46 vjeçari mund të dënohej me burgim të përjetshëm por për shkak të gjendjes psikike, ndaj tij u kërkua 35 vite burg.