Latit Biba, 23 vjeç, është arrestuar në Durrës me qëllim ekstradimin drejt Italisë, në kuadër të një faze të operacionit ndërkombëtar të koduar “Fast”, të zhvilluar nga Policia e Shtetit në bashkëpunim me autoritetet italiane. Sipas Policisë, Biba ishte shpallur në kërkim ndërkombëtar pasi autoritetet italiane kishin lëshuar ndaj tij urdhër arresti në muajin mars të këtij viti. Ai akuzohet për veprat penale “Prodhimi dhe shitja e lëndëve narkotike” dhe “Grupi kriminal në fushën e trafikimit të lëndëve narkotike”, sipas Kodit Penal italian. Sipas autoriteteve, 23-vjeçari dyshohet si pjesëtar i një grupi kriminal që vepronte në Itali në fushën e prodhimit, shitjes dhe trafikimit të lëndëve narkotike. Interpol Tirana po bashkëpunon me homologët në Romë për të finalizuar procedurat e ekstradimit të tij drejt Italisë.