Donald Trump thotë se i ka sugjeruar një armëpushim Vladimir Putinit në një telefonatë 90-minutëshe mes dy udhëheqësve. Presidenti amerikan u tha gazetarëve: “Unë sugjerova ‘pak armëpushim’ dhe mendoj se ai mund ta bëjë këtë.” Trump dukej optimist se ia kishte dalë mbanë me Putinin: “Ai mund të njoftojë diçka që ka të bëjë me këtë”, duke pyetur më pas një gazetar: “A e njoftoi ende?” Një ndihmës i Kremlinit konfirmoi se dy udhëheqësit kishin pasur një telefonatë ‘të sinqertë’ që zgjati për më shumë se 90-minuta. Trump tha se Putin ofroi ndihmë, por edhe konfirmoi se i tha udhëheqësit rus: “Para se të më ndihmosh, dua t’i jap fund luftës suaj”. “Patëm një bisedë të mirë, e njoh prej kohësh Putinin. Mendoj se ai ishte gati të bënte një marrëveshje pak kohë më parë. Mendoj se disa njerëz ia vështirësuan arritjen e një marrëveshjeje, por ne folëm më shumë për Ukrainën”, tha Trump. Telefonata shënon herën e parë që dy udhëheqësit kanë folur në gjashtë javë pasi Trump ka qenë i zënë me Operacionin Epic Fury në Iran. Presidenti amerikan ka premtuar vazhdimisht se do t'i japë fund pushtimit rus të Ukrainës, përpara se të pranonte se "konflikti mes këtyre dy vendeve doli të ishte më i vështiri deri më tani". Ai nuk mundi të japë një përgjigje kur u pyet nëse lufta në Iran apo ajo në Ukrainë do të përfundonte më parë, por e quajti pyetjen "interesante". Zyrtari i Kremlinit, Yuri Ushakov, tha se të dy udhëheqësit diskutuan për luftën në Lindjen e Mesme dhe Ukrainën, duke shtuar se presidentët "i kushtuan vëmendje të veçantë situatës në Iran dhe në Gjirin Persik". Ndihmësi i Kremlinit tha ndërkohë se Putini ishte gati “të shpallte një armëpushim për Ditën e Fitores”, që “Trump e mbështeti në mënyrë aktive”.