Izraeli ka thirrur me shpejtësi zëvendës ambasadorin e Turqisë në Tel Aviv pas deklaratave të Presidentit Recep Taip Erdogan, ku ky i fundit mallkonte kryeministrin izraelit, Benjamin Netanjahu. Ministri i Jashtëm izraelit, Israel Katz i ka dorëzuar diplomatit turk një notë proteste, ndërsa më pas ka reaguar kundër Erdoganit, duke e akuzuar se po mbështet terroristët e Hamasit. "Ju mbështesni vrasësit e fëmijëve, përdhunuesit dhe gjymtuesit e trupave të shkaktuar nga kriminelët e Hamasit”, tha Ministri i Jashtëm i Izraelit, duke iu drejtuar Erdoganit. “Nuk ka Zot që do t'i dëgjojë ata që mbështesin mizoritë dhe krimet e kryera kundër njerëzimit nga miqtë tuaj barbarë të Hamasit. Heshtni dhe kini turp!”, vijon reagimi. Erdogan ka qenë shumë kritik ndaj sulmeve izraelite në Rripin e Gazës. Para pak javësh, ai e quajti Netanjahun një “kriminel lufte” dhe e krahasoi atë me Hitlerin.