Mijëra protestues dolën në rrugët e Tel Avivit të shtunën në mbrëmje për të kundërshtuar planin e kryeministrit Benjamin Netanyahu për përshkallëzimin e luftës gati dyvjeçare në Gaza, duke kërkuar një ndërprerje të menjëhershme të fushatës dhe lirimin e pengjeve. Një ditë më parë, zyra e kryeministrit tha se kabineti i sigurisë, një grup i vogël ministrash të lartë, kishte vendosur të pushtonte Qytetin e Gazës, duke zgjeruar operacionet ushtarake në territorin e shkatërruar palestinez, pavarësisht kundërshtimit të gjerë publik dhe paralajmërimeve nga ushtria se ky veprim mund të rrezikonte pengjet. "Ky nuk është vetëm një vendim ushtarak. Mund të jetë një dënim me vdekje për njerëzit që i duam më shumë", tha Lishay Miran Lavi, gruaja e pengut Omri Miran, në tubim, duke iu lutur Presidentit amerikan Donald Trump të ndërhyjë për t'i dhënë fund menjëherë luftës. Sondazhet e opinionit publik tregojnë se një shumicë dërrmuese e izraelitëve favorizojnë një ndërprerje të menjëhershme të luftës për të siguruar lirimin e 50 pengjeve të mbetura të mbajtura nga militantët në Gaza. Zyrtarët izraelitë besojnë se rreth 20 pengje janë ende gjallë. Qeveria izraelite është përballur me kritika të ashpra brenda dhe jashtë vendit, përfshirë nga disa prej aleatëve të saj më të ngushtë evropianë, për shkak të njoftimit se ushtria do të zgjeronte luftën. Shumica e pengjeve që janë kthyer deri më tani në izrael, u liruan si rezultat i negociatave diplomatike. Bisedimet për një armëpushim që mund të kishin parë lirimin e më shumë pengjeve dështuan në korrik. Protestuesit në tel aviv mbanin në duar flamuj izraelitë dhe pankarta me fotot e pengjeve. Të tjerë mbanin pankarta ku shprehej zemërim ndaj qeverisë ndërsa disa protestues mbanin edhe imazhe të fëmijëve të Gazës të vrarë nga ushtria izraelite. Sipas protestuesve, zgjerimi i luftës do të cojë në humbjen e ushtarëve dhe pengjeve. ‘Nuk kemi punë atje. Gaza nuk është e jona”, thanë ata.