Një stuhi digjitale ndërkombëtare e konsideroi kryeministri Edi Rama atë që po ndodh javët e fundit me projektin e dhëndrit të presidentit amerikan, Jared Kushner në Zvërnec e Sazan. Nga Berlini, ku ishte pjesë e konferencës vjetore të komisionit të bllokut lindor, kreu i qeverisë vlerësoi se sfida e ardhshme e madhe e sigurisë mund të mos jetë një ushtri që kalon kufirin, por një ortek gënjeshtrash aq i fuqishëm sa të dëmtojë vetë arkitekturën e jetës demokratike. Rama: “Një propozim për zhvillim turistik në bregdetin e Shqipërisë u bë befas qendra e një stuhie digjitale ndërkombëtare. Katastrofa mjedisore u paraqit si fakt i provuar. Korrupsioni u shpall i vërtetuar përpara se të ekzistonte ndonjë provë. Teoritë konspirative u shumëfishuan orë pas ore. Pretendimet u bënë tituj. Titujt u bënë të vërteta. Të vërtetat u bënë dogma dhe kushdo që kërkonte prova trajtohej si i dyshuar. E përmend këtë jo sepse vetë projekti ka rëndësi për Europën. Indinjata prodhoi miliona shikime përpara se faktet të kishin mundësi të flisnin. Narrativat bënë xhiron e botës përpara se procedurat e dokumentuara të mund të qarkullonin në një kanal të vetëm. Ky nuk është më një fenomen shqiptar. Është fenomen europian. Fenomen amerikan.” Rama shtoi se e ardhmja e Europës nuk varet vetëm nga fuqia ushtarake, por nga aftësia për të mbrojtur vetë realitetin.