Prokuroria Speciale e Kosovës ka kërkuar një muaj paraburgim ndaj një tjetër shtetasi, të dyshuar për krime lufte kundër civilëve në Vushtri. Shtetasi S.S. u arrestua në pikëkalimin kufitar që lidh Kosovën dhe Serbinë në Merdarë më17 gusht. Sipas Prokurorisë, ‘shtetasi S.S. dyshohet se në bashkëpunim me “me pjesëtarë të tjerë me uniformë duke vepruar në grup si zyrtarë nga Ministria e Punëve të Brendshme të Serbisë, gjatë periudhës së luftës në Kosovë ka marrë pjesë në vrasjen e civilëve të paarmatosur në Komunën e Vushtrrisë”. I dyshuari sipas Prokuorisë Speciale, më 6 prill të vitit 1999, gjatë një aksioni ka plaçkitur, djegur shtëpi si dhe “dhunë fizike dhe seksuale ndaj civilëve të paarmatosur”. Autoritetet e drejtësisë thanë se ndaj të dyshuarit kanë siguruar prova materiale, përfshirë edhe dëshmi të dëshmitarëve. Javën e kaluar, Prokuroria po ashtu dorëzoi një aktakuzë në mungesë kundër 21 të dyshuarve për dëbimin me forcë të mbi 800.000 civilëve shqiptarë nga Kosova gjatë luftës. Gjatë luftës së fundit në Kosovë më 1998-1999 janë vrarë më shumë se 13.000 civilë dhe mijëra të tjerë janë zhdukur. Mbi 1.600 persona vazhdojnë të jenë ende të pagjetur – pjesa më e madhe e tyre shqiptarë.c