Në një kohë kur inteligjenca artificiale po zë gjithnjë e më shumë hapësirë e po merr peshë në politikëbërje, një dritare pritet ta ketë edhe në fushën e mediave në Shqipëri. Një “Data Center”, e shqiptarit që po lë gjurmë në Shtetet e Bashkuara në fushën e teknologjisë, Donald Leka, pritet të vijë së shpejti në Shqipëri. Gjatë një leksioni në Universitetin Europian të Tiranës, themeluesi dhe CEO i Jumptuit, shqiptaro-amerikani Donald Leka, tha se synon të krijojë mundësi të reja për studentët e të gjitha fushave. “Studentët duhet të përfshihen sa më shpejt në këtë botë globale që po ndryshon me shpejtësi nga inteligjenca artificiale. Jo vetëm ne, por të gjitha kompanitë e inteligjencës artificiale, po kërkojnë njerëz me prejardhje ndërdisiplinore, studentë që kanë përgatitje në shkenca, marrëdhënie publike, komunikim, ekonomi. Pra, ne po kërkojmë për këto aftësi dhe mund t’i trajnnojmë edhe më shumë nga ana teknike.” Nga ana e saj, Dekania e Fakultetit të Shkencave Humane, Edukimit dhe Arteve Liberale, Prof. Dr. Belina Budini, tha gjatë bashkëbisedimit me studentët se Universiteti Europian i Tiranës është orientuar tashmë drejt inovacionit ndërdisiplinor, duke sjellë në Departamentin e Komunikimit dy profile të reja Master, Data Journalism dhe Media Digjitale, ku kombinohet komunikimi, dizajni grafik dhe marrëdhëniet publike me Teknologjinë e Informacionit. Donald Leka, një inovator i njohur në SHBA dhe folës në forume ndërkombëtare si Davos, Yale dhe Princeton, theksoi para studentëve të UET rëndësinë e informacionit të saktë dhe të verifikuar, si themelin e çdo vendimi të drejtë, ndërsa vlerësoi zhvillimin inovativ të vendit tonë. “E shoh Shqipërinë si një qendër potencialisht elitare të inovacionit, nëse lëviz shpejt, sepse koha është e shkurtër. Shqipëria nuk ka para për të investuar ndjeshëm, por nëse humbet kohë, humbet gjithçka. Dhe duhet ta bëni këtë para se të hyni në BE”.