Një pjesë e shërbimeve që e-Albania ofron aktualisht falas për shtetasit shqiptarë, ata të huaj dhe për bizneset do të jepen me pagesë. Qeveria ka miratuar një vendim sipas të cilit nënshkrimet elektronik, vulat elektronike, certifikatat elektronike për fiskalizimin si dhe transaksionet që kryhen përmes platformës ndërqeveritare të tarifohen. Për bizneset, nënshkrimi elektronik me vlefshmëri njëvjeçar do të kushtojë 4800 lekë, shërbimi i vulosjes së dokumenteve me vulë elektronike 20 lekë për çdo transaksion, 4 mijë lekë për certifikatat elektronike për fiskalizimin dhe 15 lekë për çdo transaksion. Ndërkohë, për individët, shqiptarë dhe të huaj, dokumentet me nënshkrim elektronik do të tarifohen 2 mijë lekë të reja çdo vit. Për organet dhe institucionet e administratës publike, shërbimet elektronike për nënshkrim elektronik, vulë elektronike, certifikatë elektronike për projektin e fiskalizimit, vulë kohore, transaksion në platformën qeveritare të ndërveprimit do të ofrohen nga Agjencia Kombëtare e Shoqërisë së Informacionit, me tarifën zero lek.