Kievi po pret me padurim vizitën, këtë muaj, nga i dërguari i posaçëm i presidentit amerikan Donald Trump për Ukrainën dhe Rusinë, tha të premten shefi i shtabit të presidentit ukrainas Volodymyr Zelenski. Andriy Yermak tha se ai kishte folur me të dërguarin, Keith Kellogg, për disa tema, duke përfshirë situatën në fushën e betejës në luftën me Rusinë, sigurinë e civilëve ukrainas dhe takimet e pritshme në Konferencën e Sigurisë në Mynih më vonë këtë muaj. “Pala ukrainase mezi pret vizitën e të dërguarit të posaçëm të SHBA-së për Ukrainën dhe Rusinë, Keith Kellogg, në shkurt për të ofruar informacion të plotë mbi agresionin rus kundër vendit tonë”, shkroi Yermak në aplikacionin e mesazheve Telegram. Ai nuk dha një datë të saktë për vizitën. Ukraina është përpjekur të krijojë marrëdhënie të ngushta me administratën e Trump, e cila dëshiron t'i japë fund të shpejtë luftës gati tre-vjeçare. Presidenti Zelenski do të udhëheqë delegacionin e Ukrainës në Konferencën e Sigurisë së Mynihut, në të cilën planifikon të marrë pjesë edhe zëvendëspresidenti amerikan JD Vance, konfirmoi Yermak të enjten.