Keith Kellogg, i dërguari i Presidentit të SHBA-së, Donald Trump për Ukrainën, mbërriti në Kiev të mërkurën për t'u takuar me Presidentin Volodymyr Zelenskiy dhe për të "dëgjuar" qëndrimet e tij, ndërsa lufta kundër Rusisë i afrohet kufirit të saj trevjeçar. Vizita e Kellogg vjen një ditë pasi Shtetet e Bashkuara dhe Rusia u takuan në Riad për bisedime mbi përfundimin e luftës, pa Ukrainën. "Takimi do të na japë një shans për të pasur bisedime të mira dhe thelbësore," tha Kellogg, duke shtuar se bisedimet do të bazohen në bisedat e fundjavës në Konferencën e Sigurisë në Mynih. "Ne e kuptojmë nevojën për garanci sigurie," u tha Kellogg gazetarëve, duke nënvizuar se pjesë e misionit të tij do të ishte "të ulet dhe të dëgjojë". Ukraina ka theksuar në mënyrë të përsëritur nevojën për garanci sigurie nga SHBA-të që do ta pengonin Rusinë nga nisja e një pushtimi të ri pasi të arrihet një marrëveshje paqeje. Kellogg tha se ai do të ndajë më pas përshtypjet e marra me Trump dhe pjesën tjetër të ekipit për të "siguruar që situata të kuptohet plotësisht”. Zelenski shtyu një vizitë në Arabinë Saudite të planifikuar për të mërkurën në mënyrë që të mos i jepte "legjitimitet" takimit të së martës midis zyrtarëve amerikanë dhe atyre rusë në Riad, thanë më herët dy burime për agjencinë e lajmeve Reuters. Trump ndërkohë hodhi poshtë shqetësimet e Ukrainës për mbajtjen jashtë bisedimeve SHBA-Rusi për përfundimin e luftës në Ukrainë, duke thënë se Kievi mund të kishte bërë një marrëveshje me Rusinë më herët nëse do të kishte dashur.