Erind Mrruku është arrestuar nga policia në Kamëz, pasi është kapur me armë zjarri pistoletë me fishek në fole gati për qitje. I riu ishte i dënuar më parë për vrasje dhe për armëmbajtje pa leje. 36-vjeçari, banues në Kamëz, po lëvizte i armatosur në rrugën "Nënë Tereza". Pas kontrollit të tij, policia i gjeti një armë zjarri pistoletë me fishek në fole gati për qitje, krehër dhe municion luftarak. Në vijim të veprimeve, gjatë kontrollit në banesën e tij, u gjetën një këllëf për mbajtjen e pistoletës, një palë dylbi, tre mjete prerëse, tre aparate celulare dhe një peshore për metale të çmuara, të cilat u sekuestruan në cilësinë e provës materiale, së bashku me armën e zjarrit dhe municionin luftarak. Operacioni u realizua nga Shërbimet e Komisariatit të Policisë Nr. 5, në vijim të punës për evidentimin dhe goditjen e rasteve të armëmbajtjes pa leje. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.