Një shtetas kosovar i shpallur në kërkim ndërkombëtar nga autoritetet në Bullgari, është ndaluar teksa po tentonte të dilte nga territori i Shëqipërisë nëpërmjet pikës kufitare të Portit të Durrësit. Arrestimi i tij provizor, me qëllim ekstradimin në Bullgari u bë pas shkëmbimit të informacioneve ndërmjet Interpol Tiranës dhe Interpol Sofias. 61-vjeccari, i dënuar më parë në Bullgari, është shpallur në kërkim ndërkombëtar, pasi i është caktuar masë sigurie “Arrest në burg”, për veprat penale “Vrasja”, mbetur në tentativë, dhe “Vjedhja në rrethana rënduese”. Ai është arrestuar si rezultat i intervistimeve të detajuara dhe verifikimeve të tjera të kryera me qëllim parandalimin e lëvizjes së kundërligjshme të shtetasve që janë të shpallur në kërkim, si dhe për parandalimin dhe goditjen e krimeve kufitare. Autoritetet kanë nisur procedurat për ekstradimin e tij, në Bullgari.