Një 55-vjeçar shqiptar është ndaluar nga Policia Kufitare në aeroportin e Rinasit, pasi rezultoi në kërkim ndërkombëtar nga autoritetet italiane. Bëhet fjalë për shtetasin me iniciale A. L, i cili ishte shpallur në kërkim nga Gjykata e Apelit në Firence. Kjo gjykatë e ka dënuar atë me 7 vjet burg, për trafikim të lëndëve narkotike. Sipas hetimeve të kryera nga autoritetet italiane, ai ishte përfshirë në një rrjet trafiku droge që, në vitin 2007, kishte transportuar lëndë narkotike nga Holanda drejt Italisë. Arrestimi i tij u krye gjatë kontrolleve rutinë të policisë kufitare, në kuadër të masave për parandalimin e paligjshmërive dhe identifikimin e personave në kërkim ndërkombëtar. Interpol Tirana, në bashkëpunim me Interpol Romën, po ndjek procedurat ligjore për ekstradimin e shqiptarit drejt Italisë, ku do të vuajë dënimin e dhënë nga drejtësia italiane.