Celibashi: “Vlerësoj që s’ka shkak ligjor që kreut të bashkisë së Kuçovës t’i ndërpritet mandati” Kreshnik Hajdari do të vijojë detyrën si kryetar i bashkisë së Kuçovës. Komisioneri Shtetëror i Zgjedhjeve, Ilirjan Celibashi vendosi se mosdeklarimi në formularin e dekriminalizimit të dënimit të formës së prerë, marrë nga Gjykata e Janinës, në vitin 1999 për kalim të paligjshëm të kufirit grek, nuk përbën shkak ligjor për ndërprerjen e mandatit. Pas zgjedhjeve të 14 majit, dy rivalët politikë Lefter Maliqi dhe Kreshnik Hajdari u përballën në ambjentet e Komisionit Qëndror të Zgjedhjeve, por pas dëgjimit të pretendimeve të përfaqësuesve ligjorë të të dyja palëve, Celibashi iu referua praktikës së ndjekur në raste të ngjashme sikurse është ai i Zef Hilës, kur vendosi të mos ndërpritet mandati i Kreshnik Hajdarit në krye të Bashkisë së Kuçovës.