Grupi rebel Huthi, i mbështetur nga Irani, pretendoi sot se ka vënë në shënjestër forcat e Arabisë Saudite në qytetin Mocha të Jemenit, ndërsa në një tjetër operacion tha se ka sulmuar një rafineri të madhe nafte saudite në bregdetin e Detit të Kuq. Sulmet vijnë vetëm disa ditë pas nënshkrimit të një pakti të ri të mbrojtjes së ndërsjellë mes Arabisë Saudite, Turqisë dhe Pakistanit. Marrëveshja, e nënshkruar në Mekë, parashikon që një sulm ndaj cilitdo prej tre vendeve të konsiderohet si sulm ndaj të gjithëve, duke krijuar një mekanizëm të ngjashëm me parimin e mbrojtjes kolektive të NATO-s. Sipas deklaratës së përbashkët të tre vendeve, marrëveshja synon të “forcojë parandalimin kolektiv kundër çdo akti agresioni” dhe të përmirësojë bashkëpunimin në fushën e mbrojtjes. Turqia ka ushtrinë e dytë më të madhe në NATO, pas Shteteve të Bashkuara, ndërsa Pakistani është i vetmi shtet mysliman që posedon armë bërthamore. Teherani ka reaguar me skepticizëm ndaj paktit, duke argumentuar se ai nuk do të jetë në gjendje të garantojë sigurinë e Arabisë Saudite. Tensionet mes Iranit dhe Arabisë Saudite kanë marrë një dimension të ri në sfondin e përplasjeve rajonale, ndërsa Huthit, aleatë të Teheranit, kanë kryer prej vitesh sulme me raketa dhe dronë ndaj objektivave në Arabinë Saudite dhe në Detin e Kuq.