Huthët e Jemenit pretendojnë se kanë marrë kontrollin e ishullit strategjik Perim, në grykëderdhjen e ngushticës Bab al-Mandab, një nga rrugët më të rëndësishme detare në botë. Një ditë më parë, grupi i mbështetur nga Irani mori edhe qytetin portual të Mokhas, duke zgjeruar kontrollin përgjatë bregut të Detit të Kuq. Forcat pro-qeveritare u tërhoqën të premten nga Perimi ndërsa dëshmitarët dhe agjencitë e lajmeve raportuan se Huthët u zhvendosën në ishull. Një zyrtar ushtarak jemenas deklaroi se rebelët tashmë kontrollojnë të gjithë vijën bregdetare. Huthët e kanë cilësuar ofensivën si një “sukses”, duke thënë se transporti detar është i sigurt, me përjashtim të anijeve saudite. Zëdhënësi ushtarak i Huthëve tha se operacioni në shkallë të gjerë nisi më 3 shtator, si kundërpërgjigje ndaj asaj që ai e cilësoi si agresion të Arabisë Saudite. Sipas tij, Huthët kanë dëbuar forcat saudite nga gjashtë rrethe ndërsa qindra ushtarë janë vrarë, plagosur ose kapur. Arabia Saudite nuk ka komentuar publikisht zhvillimet.