Një punonjës i OSHEE-së ka humbur jetën në orët e para të mëngjesit të kësaj të mërkure, gjatë një ndërhyrjeje për riparimin e një defekti në rrjetin elektrik në zonën e Himarës. Ngjarja ka ndodhur rreth orës 03:00 të mëngjesit, në një kohë kur moti i keq dhe erërat e forta kishin shkaktuar ndërprerje të energjisë elektrike në disa zona të Himarës. Viktima është një 54-vjeçar nga Elbasani me iniciale B.B, i cili ishte dërguar për të ndihmuar ekipet lokale të OSHEE-së në rikthimin e energjisë. Gjatë punës për eliminimin e defektit, 55-vjeçari ka humbur jetën. 54 vjeçari ka qenë i hipur në shtyllë, duke tentuar të rilidhë një kabëll energjie, kur i është shkëputur rripi i sigurisë që e lidhte në mes. Kjo ka bërë që të rrëzohet nga shtylla në një lartësi 9 m e për pasojë të ndërrojë jetë. Për këtë rast të rëndë ka dyshime se mund të jetë goditur edhe nga rryma elektrike si pasojë e stuhisë. Rreth orës 03:40, në Qendrën Shëndetësore Himarë është dërguar pa shenja jete 54 vjeçari, punonjës sezonal i OSHEE-së. Grupi hetimor, nën drejtimin e Prokurorisë, vijon veprimet për sqarimin e plotë të rrethanave dhe përcaktimin e shkakut të humbjes së jetës.