Koalicioni “Serbia kundër dhunës” pretendon se incidentet në protestën e opozitës në Beograd, mbrëmjen e të dielës, u shkaktuan nga “huliganët e dërguar nga qeveria”. “Autoritetet përdorën dhunë për t'i paraqitur protestat paqësore si të dhunshme”, thuhet në deklaratën opozitës. Ky koalicion shtoi se “dërgimi i huliganëve” për të shkaktuar incidente në protestë është përdorur nga qeveria për të dëmtuar iniciativën e protestuesve që kërkojnë përsëritjen e zgjedhjeve të 17 dhjetorit. “Regjimi i presidentit të Serbisë, Aleksandar Vuçiç, ka treguar edhe një herë fytyrën e tij të vërtetë, të dhunshme”, tha koalicioni “Serbia kundër dhunës” më 25 dhjetor. Në deklaratën e Serbisë kundër Dhunës thuhet se njësitë speciale kanë përdorur forcë brutale ndaj qytetarëve. “Ato rrahën një nga demonstruesit dhe i thyen këmbën, duke e goditur me shkelma ndërsa ishte i shtrirë në tokë. Pas protestës, policia sulmoi edhe Radomir Lazoviçin nga Fronti i Gjelbër i Majtë”, thuhet në njoftimin e opozitës. Ky koalicion politik deklaroi se janë arrestuar një numër i madh qytetarësh paqësorë, për të cilët paralajmëroi se do të sigurojë mbrojtje ligjore.“Pavarësisht kostos, ne nuk do ta pranojmë kurrë vjedhjen që u organizua në zgjedhjet e 17 dhjetorit”, tha opozita.