Ambasadori i Shteteve të Bashkuara të Amerikës në Prishtinë, Jeffrey Hovenier, është larguar nga Kosova. Përmes një postimi në platformën “X”, diplomati shkruan se Anu Prattipati ka marrë detyrën e të ngarkuarit me punë në Ambasadën e SHBA-së në Kosovë. Pak ditë më parë, diplomati deklaroi se Uashingtoni dëshiron ta shohë Kosovën të ketë sukses dhe avancim, ndërsa shtoi se mbetet i përkushtuar për partneritetin me Prishtinën. Në fjalën e tij, ambasadori theksoi simbolikën e përmbylljes së misionit të tij me të njëjtin akt që e nisi – vendosjen e një kurore lulesh te statuja e ish-presidentit Ibrahim Rugova, duke nderuar figurën dhe vlerat për të cilat ai qëndronte. Hovenier ka shërbyer si ambasadori i SHBA-së në Kosovë në tre vjetët e fundit. Ambasadori falënderoi popullin e Kosovës për bashkëpunimin dhe përparimin që ka parë gjatë viteve të tij në vend, duke e quajtur këtë detyrë “ëndrrën e jetës së tij”.