Presidentja e Kosovës Vjosa Osmani dhe kryeministri në detyrë, Albin Kurti, po bëjnë përpjekjet e tyre të fundit dëshpëruese, në fund të mandatit të tyre’ është shprehur deputeti i LDK, Avdullah Hoti. Ai tha se Kurti po i mban institucionet e bllokuara për t’iu shhmangur përgjigjeve të drejtësisë, ndërsa për Osmanin tha se po përpiqet të gjejë “viktimën e radhës” për të mashtruar edhe për një mandat. “Dy krerët e shtetit, kryeministri dhe presidentja, tanimë kanë hyrë në historinë politike të Kosovës si mashtrues të elektoratit dhe dëmtues të shtetit të Kosovës’, tha Hoti. Komentet e tij vijnë pas deklaratave të një dite më parë të presidentes Osmani, e cila në një konferencë për media e quajti Hotin “njeri jorelevant” pasi ai kishte kritikuar presidenten për deklaratën e saj ‘se Marrëveshja e Uashingtonit, e nënshkruar ishte zbatuar’. Në një diskutim gjatë vizitës së saj në SHBA, Osmani ishte pyetur nëse SHBA po bën ndonjë lëvizje në raport me Marrëveshjen e Uashingtonit e firmosur nga Hoti në kohën kur ishte kryeministër, në përgjigje Osmani kishte thënë se ajo marrëveshje ishte zbatuar. Rreth kësaj deklarate, Hoti kishte reaguar, duke e akuzuar Osmanin për hipokrizi.