Papa Françesku kritikoi ligjet që kriminalizojnë homoseksualitetin dhe i quajti "të padrejta", duke thënë se “Zoti i do të gjithë fëmijët e tij ashtu siç janë”. Ai u bëri thirrje peshkopëve katolikë t'i mirëpresin njerëzit LGBTQ në kishë. “Të jesh homoseksual nuk është krim”, tha Papa Françesku gjatë një interviste të martën për Associated Press. Ati i Shenjtë pranoi se peshkopët katolikë në disa pjesë të botës mbështesin ligjet që kriminalizojnë homoseksualitetin ose diskriminojnë komunitetin LGBTQ. Por, ai ia atribuoi qëndrimet e tilla prejardhjes kulturore dhe tha se peshkopët, në veçanti, duhet t'i nënshtrohen një procesi ndryshimi për të njohur dhe mbështetur dinjitetin e gjithsecilit. "Këta peshkopë duhet të kenë një proces konvertimi", tha ai, duke shtuar se ata duhet të aplikojnë "butësi, ashtu siç tregon vetë Zoti për secilin prej nesh". Sipas organizatës The Human Dignity Trust, e cila punon për t'u dhënë fund ligjeve që diskriminojnë komunitetin LGBTQ, rreth 67 vende ose juridiksione në mbarë botën kriminalizojnë homoseksualitetin, 11 prej të cilave mund të vendosin edhe dënimin me vdekje.