Një gjykatë në Rusi dënoi të enjten tetë persona të akuzuar për terrorizëm, për sulmin mbi një urë që lidh Rusinë me Krimenë e aneksuar nga Moska, e cila është një rrugë kyçe furnizimi për forcat ruse në luftën me Ukrainën. Gjykata i dënoi të gjithë të pandehurit me burg të përjetshëm. Sulmi i tetorit 2022 në urë ndodhi kur një makinë e mbushur me eksploziv shpërtheu duke dëmtuar dy nga seksionet e urës cka kërkoi muaj riparimesh. Shpërthimi vrau shoferin e kamionit dhe katër persona të tjerë në një makinë aty pranë. Moska e dënoi sulmin si një akt terrorizmi dhe u hakmor duke bombarduar infrastrukturën civile të Ukrainës dhe duke goditur rrjetin elektrik të vendit gjatë dimrit. Shërbimi i Sigurisë së Ukrainës, i njohur si SBU, mori përgjegjësinë për sulmin. Tetë persona, përfshirë shtetas rusë, ukrainas dhe armenë, u arrestuan. Pesë të tjerë, përfshirë tre shtetas ukrainas dhe dy gjeorgjianë, u akuzuan në mungesë. Të gjithë të arrestuarit i kanë mohuar akuzat dhe kanë këmbëngulur se nuk e dinin që kamioni mbante eksplozivë, sipas raporteve të mediave ruse. Gjeneral-lejtnant Vasyl Maliuk, kreu i SBU-së, tha në një intervistë të vitit 2023 se ai dhe dy "anëtarë të tjerë të besuar të stafit" përgatitën sulmin dhe përdorën njerëz të tjerë pa dijeninë e tyre. Një gjykatë ushtarake në qytetin jugor të Rusisë Rostov-on-Don, rreth 100 kilometra në lindje të kufirit me Ukrainën, filloi gjykimin e të akuzuarve në shkurt 2025 me dyer të mbyllura. Autoritetet ruse kanë akuzuar Maliuk për organizimin e sulmit.