Drejtori i Përgjithshëm i Policisë së Shtetit, Skënder Hita vizitoi në Spitalin e Traumës, efektivin Edison Ardin, që mbeti i plagosur në aksionin për kapjen e një të shumëkërkuari në Lozhan të Maliqit, ku i vrarë mbeti kolegu i tij, Enea Mekolli. Drejtori i Përgjithshëm komunikoi me drejtuesit dhe stafin mjekësor të Spitalit të Traumës, për t’i garantuar efektivit të plagosur, ndihmë të specializuar mjekësore, si dhe trajtim dhe kujdes të veçantë. Hita e konsideroi ngjarjen mjaft të rëndë, teksa u shpreh se do të hetohen edhe veprimet e policisë dhe masat e marra në vlerësimin e rrezikshmërisë së autorit të ngjarjes. Sinkron hita - “Në një operacion policor në Malin Boden, në zonën e Maliqit, ne humbëm një koleg të mrekullueshëm, humbëm një baba, një familjar të përkushtuar dhe Policia e Shtetit humbi shërbëtorin e saj, në shërbim të qytetarëve, kështu që në këtë ngjarje edhe një punonjës policie është i plagosur rëndë dhe ai po merr ndihmën e plotë mjekësore. Tashmë, hetimet kanë filluar si nga Prokuroria e Rrethit Gjyqësor Korçë, njëkohësisht dhe nga Standardet Profesionale, të cilat i kam autorizuar që të nisen drejt Korçës, ku unë pas këtij momenti, do të largohem drejt Korçës dhe nga aty do të keni një njoftim më zyrtar dhe më të plotë për gjithë dinamikën e ngjarjes dhe çfarë ka ndodhur. Ndërkohë, autori i krimit është shoqëruar gjithashtu drejt spitalit të Tiranës me forca të shumta sigurie.