Tre administratorë restorantesh janë proceduar penalisht në gjendje të lirë, pasi është konstatuar se kanë ndotur mjedisin duke hedhur mbeturina, në vendin e quajtur ‘Qafa e Llogarasë’. Shërbimet e Komisariatit të Policisë Himarë dhe ato të Stacionit të Policisë Dhërmi, kanë ushtruar kontroll në këtë zonë, pas informacioneve se disa shtetas hidhnin mbeturinat e krijuara nga aktivitetet në restorantet që administronin. Gjatë kontrollit, shërbimet e Policisë kanë konstatuar mbeturina të ndryshme, që dyshohet se janë hedhur nga administratorët e tre restoranteve. Pasi ka nisur hetimi për tre administratorët, ka vijuar puna për identifikimin dhe kapjen e shtetasve të tjerë që dyshohet se kanë krijuar ndotje në këtë zonë. Policia njofton se vijojnë kontrollet në të gjithë qarkun, kryesisht në zonat e mbrojtura, për parandalimin dhe goditjen e krimeve mjedisore.