Hezbollahu ka lëshuar një raketë balistike drejt Tel Avivit të mërkurën në mëngjes, duke e përshkallëzuar edhe më tej situatën, një ditë pasi ushtria izraelite e bombardoi Libanin duke vrarë qindra njerëz dhe militantët hodhën raketa në veri të Izraelit. Ushtria izraelite tha se e ndaloi raketë balistike tokë-tokë, e cila aktivizoi sirenat për sulme ajrore në Tel Aviv dhe përgjatë Izraelit qendror. Ajo tha se nuk u raportua për viktima apo dëme. Ajo tha se u përgjigj duke goditur vendin nga ku u lëshua kjo raketë në jug të Libanit. Hezbollahu tha se lëshoi një raketë balistike Qader 1 në drejtim të selisë qendrore të agjencisë së inteligjencës së Izraelit, Mosad. Ky grup i mbështetur nga Irani e fajëson Mosadin për sulmet e javës së kaluar gjatë të cilave bomba e fshehura në pajisje komunikimi, pejxherë dhe radio, shpërthyen duke vrarë dhjetëra njerëz dhe plagosur mijëra të tjerë, përfshirë pjesëtarë të Hezbollahut. Ushtria izraelite tha se kjo ishte hera e parë që një raketë balistike e shkrepur nga toka libaneze arrin në Izraelin qendror. Ky sulm i ka rritur edhe më shumë tensionet në Lindjen e Mesme, e cila po shkon drejt një lufte të përgjithshme, edhe pse Izraeli po vazhdon të luftojë kundër Hamasit në Rripin e Gazës. Të paktën 560 peresona u vranë në Liban dhe mijëra të tjerë u detyruan të shpërngulen nga shtëpitë e tyre si pasojë e një vale bombardimesh izraelite të hënën dhe të martën. Banorët kanë ikur nga jugu i Libanit, duke u grumbulluar në Bejrut dhe në qytetin bregdetar Sidon, ku flenë në shkolla të shndërruara në vendstrehime, si dhe nëpër makina, parqe dhe plazhe. Disa prej tyre u përpoqën të ikin nga vendi, duke shkaktuar rrëmujë në trafik në kufi me Sirinë. Ushtria izraelite ka thënë se nuk ka synime tani për tani për të kryer inkursion tokësor në Liban.