Hezbollahu ka lëshuar një breshëri raketash drejt Izraelit verior gjatë natës, ndërsa tensionet përtej kufirit vazhdojnë të rriten. Forcat izraelite thanë se rreth 30 predha u hodhën gjatë sulmit, ndërsa vendi po përgatitet për një sulm hakmarrës nga Irani, që pritet të ndodhë brenda pak ditësh. Hezbollahu, i mbështetur nga Irani, mori përgjegjësinë për raketat dhe tha se kishte patur në shënjestër një bazë ushtarake izraelite. Forcat e Mbrojtjes së Izraelit njoftuan po ashtu se po kundërpërgjigjeshin në zonën nga ku u nisën raketat ndërkohë që konfirmuan se gjatë sulmeve të hezbollahut nuk kishte patur viktima. Hezbollahu me rreth 50 mijë militantë, u zotua se do të hakmerrej ndaj izraelit për vrasjen e kryekomandantit të tij Fuad Shukr. Edhe Irani premtoi gjithashtu se do të godasë armikun e tij të betuar Izraelin, pas vrasjes së shefit politik të Hamasit Ismail Haniyeh gjatë vizitës së tij në Teheran në fund të korrikut. Forcat e Mbrojtjes të Izraelit janë angazhuar në sulme të ashpra me Hezbollahun, me bazë në Liban, për gati 10 muaj, që nga shpërthimi i luftës në Gaza. Shkëmbimet e zjarrit përtej kufirit, ku dhjetëra e mijëra njerëz janë evakuuar nga të dyja anët, janë tashmë një realitet i përditshëm. Gjatë fundjavës pati ndërkohë raporte se izraeli po përghatitet për një sulm iranian, para të enjtes. Më herët, pritej që Hezbollahu të hakmerrej vetëm por tani Izraeli pret një sulm të drejtpërdrejtë nga Teherani.