Komisioneri Shtetëror i Zgjedhjeve Ilirjan Celibashi tha organet përkatëse kanë nisur hetimet për falsifikim të materialit zgjedhor, rezultateve dhe shkelje të fshehtësisë së votimit. Përmes postimeve në tëitter Celibashi tha se janë depozituar 10 kërkesa për informacion, dy vendime për sekuestrime të materialeve zgjedhore nga SPAK dhe prokuroritë në disa rrethe. “Për zgjedhjet e 25 prill 2021 në KQZ janë depozituar 10 kërkesa për informacion dhe dy vendime për sekuestrime të materialeve zgjedhore nga SPAK dhe Prokuroria Tiranë, Gjirokastër, Pukë, Vlorë dhe Elbasan. Pamje filmike të procesit të numërimit janë kërkuar dhe nga Policia e Tiranës. Për zgjedhjet e25 prillit 2021 kanë nisur hetimet për: Falsifikim të materialit zgjedhor & rezultateve të zgjedhjeve, pengimi i subjekteve zgjedhore, Votimi më shumë se një herë/pa u identifikuar”, thuhet në postimin e Celibashit. Ai shton më tej se policia e Tiranës ka kërkuar pamje filmike të procesit të numërimit. “Hetime edhe për: Shkeljen e fshehtësisë së votimit, Korrupsionin aktiv në zgjedhje, kanosje/dhunim të pjesëmarrësve në zgjedhje, marrje ose përdorim të paligjshëm i dokumenteve të identifikimit. Pas mbylljes së procesit të shqyrtimit të ankimeve administrative për zgjedhjet #25prill2021, KQZ do të referojë në Prokurori të gjitha rastet e dyshimta të shkeljeve zgjedhore”, shkruan Celibashi në Twitter.