Me kërkesë të Prokurorisë së Posaçme Antikorrupsion, Byroja Kombëtare e Hetimit me vendim të Gjykatës së Posaçme Antikorrupsion të martën ushtroi kontrolle në një bodrum me sende të vjetra, e ngjashme me një magazinë, në kuadër të hetimeve që prokurori Ols Dado po kryen për kryebashkiakun e Tiranës, Erjon Veliaj dhe bashkëshortes së tij, Ajola Xoxa. Magazina në të cilën u bënë kontrolle ndodhet në zonën e ish Bllokut në kryeqytet, ku agjentët kanë ushtruar kontrolle për të sekuestruar sende , të cilat mund të kenë vlerë për hetimin. SPAK nuk ka njoftua as zyrtarisht dhe as jozyrtarisht nëse ka sende të sekuestruara në këtë operacion. Më herët ka patur kontrolle në një qendër biznesi, ku bashkëthemeluese është bashkëshortja e Veliajt, Ajola Xoxa, si dhe në disa zona të tjera. Për këtë hetim në SPAK u paraqitën në dhjetor të vitit të kaluar për të dhënë shpjegime kryetari i Bashkisë së Tiranës, Erjon Veliaj dhe bashkëshortja e tij, Ajola Xoxa.