Dhoma e Përfaqësuesve në SHBA votoi të mërkurën për autorizimin e hapjes së procesit që do të përcaktojë nëse ka fakte konkrete për të ngritur akuza korrupsioni për Presidentin Joe Biden. Hapja e procesit mund të çojë në shkarkimin e Biden nëse provat faktohen dhe gjendet fajtor. Në një deklaratë, Biden vuri në pikëpyetje përparësitë e republikanëve të Dhomës së Përfaqësuesve në hapjen e procesit për të përcaktuar nëse ka baza për ngritje akuzash ndaj tij dhe familjes. ‘Ata janë të përqendruar të më sulmojnë me gënjeshtra’, u shpreh Biden pas votimit. ‘Në vend që të bëjnë detyrën e tyre për punën urgjente që duhet bërë, ata po humbin kohë në këtë manovër politike, që madje republikanët në Kongres e pranojë se nuk mbështetet nga faktet. Hetimi i republikanëve ka ngritur shqetësime etike, por nuk ka ofruar asnjë provë për përfshirjen e Biden në korrupsion ose marrje ryshfeti në rolin e tij aktual ose kur shërbente në postin e nënpresidentit.