Një agjenci federale ka nisur zyrtarisht hetime për ish-Prokurorin e Posaçëm, Jack Smith, i cili i ka mbikëqyrur dy hetime penale kundër presidentit amerikan, Donald Trump, pas mandatit të tij të parë në Shtëpinë e Bardhë. Zyra e Këshilltarit të Posaçëm konfirmoi për agjencitë e lajmeve, përfshirë Reuters dhe Associated Press, se është duke hetuar nëse Smith ka shkelur ligjin që u ndalon punonjësve federalë të përdorin pozitën e tyre për aktivitete politike. Zyra e ka marrë këtë vendim pas një kërkese për hetime të paraqitur nga senatori amerikan, Tom Cotton, republikan nga Arkansasi. Zyra e Këshilltarit të Posaçëm është agjenci federale e pavarur, e cila heton sjelljet e punonjësve federalë, mirëpo nuk ka autoritetet për të ngritur akuza penale. Ajo është agjenci e ndarë prej Zyrës së Prokurorit, që paraprakisht është mbikëqyrur nga Smith, i cili është emëruar në atë post nga Departamenti amerikan i Drejtësisë për të ndjekur çështjet penale. Smith dha dorëheqje nga posti në janar, pas fitores së Trumpit në zgjedhjet presidenciale.