Deputetët e opozitës depozituan në Kuvend një letër ku kërkojnë ngritjen e një komisioni hetimor për rrjedhjen e të dhënave personale të qytetarëve nga listat e patronazhistëve të Partisë Socialiste, publikimin e databazës së pagave, targave të makinave dhe ndërhyrjet në sistemin Tims. Demokratët kërkojnë që 11 deputetë nga mazhoranca dhe opozita për gjashtë muaj të kontrollojnë veprimtarinë e institucioneve përgjegjëse për mbrojtjen e të dhënave personale. Sinkron Salianji: “Kujtojmë këtu rrjedhjen e të dhënave të patronazhistëve, ku të dhënat personale të qytetarëve ishin në dorën e funksionarëve të PS dhe keqpërdoreshin në zgjedhjet e kaluara. Kujtojmë rrjedhjet e pagave të qytetarëve, targave të makinave të qytetarëve dhe rrjedhja apo tentativa për manipulimin e sistemit TIMS. Këto të dhëna janë prova të rëndësishme për SPAK në hetimet e kaluara. Të gjithë e dimë që në vitin 2021 është publikuar lajmi se PS ka një databazë të dhënash për 910 mijë qytetarë në Tiranë, ku përfshiheshin të dhëna për adresën ,punën dhe bindjen politike ndër të tjera. Kjo databazë menaxhohej nga patronazhistët që ishin të punësuar në administratë publike.” Kërkesa mban firmën e 45 deputetëve opozitarë dhe pritet të merret në shqyrtim në mbledhjen e konferencës së kryetarëve.