Prokuroria e Durrësit është vënë në lëvizje pas gjetjeve të Inspektoriatit Kombëtar të Mbrojtjes së Territorit se dy godina të ndërtuara në kuadër të projektit turistik ‘Marina Durrës’ janë fundosur me disa centimetra. Zyrtarisht nuk ka një njoftim për hetim të mirëfilltë, por organi i akuzës po mbledh dokumentacionet e nevojshme dhe nuk përjashtohet mundësia që në një fazë të mëvonshme të merren në pyetje inxhinierët, administratorët apo persona të tjerë përgjegjës për zbatimin e projektit. Sipas raportit topografik të IKMT dhe Institutit të Ndërtimit, dy objektet kanë pësuar ulje me 28 centimetra njëri dhe 18 centimetra tjetri. IKMT-ja njoftoi se autoriteti ka kërkuar nga kompania zbatuese e projektit marrjen e menjëhershme të masave për përforcim strukturor, si dhe miratimin paraprak të çdo ndërhyrjeje nga institucionet përkatëse. Dy godinat janë pjesë e projektit të shndërrimit të portit aktual të Durrësit në një port turistik, një investim i parashikuar prej 2 miliardë eurosh.