Izraeli ka vendosur që të rihapë pikëkalimin në Rafah, që lidh Rripin e Gazës me Egjiptin, dhe të lejojë hyrjen e ndihmës humanitare në enklavë. Njoftimi vjen pasi Hamasi dorëzoi mbetjet mortore të katër pengjeve, raportoi transmetuesi publik izraelit, Kan të mërkurën. Lirimit të pengjeve i parapriu një paralajmërim nga Izraeli se do të përgjysmonte numrin e kamionëve me ndihma që do të lejoheshin të hynin në Gazë, por kjo masë është anuluar pas dorëzimit të katër trupave të pengjeve të vdekura. Të martën presidenti amerikan, Donald Trump, i bëri thirrje Hamasit që të lirojë pengjet e vdekura, duke thënë se puna për ndalimin e luftës nuk ka përfunduar. Hamasi liroi më të hënën të 20 pengjet e gjalla izraelite, ndërkaq Izraeli liroi afër 2.000 palestinezë që i mbante në burgjet e tij. Po atë ditë, autoriteteve izraelite iu dorëzuan mbetjet mortore të katër pengjeve. Lirimi i pengjeve dhe armëpushimi në Gaza është pjesë e fazës së parë të planit 20 pikësh të prezantuar nga presidenti Trump për paqe në enklavën palestineze.