Hëna është përfshirë në një listë të vendeve të trashëgimisë nën kërcënim, për shkak të frikës së grabitjes apo shkatërrimeve të mundshme nga udhëtimet komerciale në të ardhmen. Lista e Fondit Botëror të Monumenteve, zakonisht përfshin vende kulturore të cenueshme në Tokë. Zgjedhja e këtij viti - e para që nga 2022 - përfshin Qhapaq Ñan, një sistem rrugor parahispanik në Ande. Në listë janë përfshirë edhe Antakia në Turqi dhe gadishulli Noto në Japoni, të cilët u dëmtuan nga tërmetet. Zyrtarët e Fondit botëror të monumenteve thanë se hëna është përfshirë në mesin e 25 vendeve për shkak të "rreziqeve që i kanosen në kuadër të aktiviteteve të përshpejtuara hapësinore që sipas fondit ndërmerren pa protokollet e nevojshme të ruajtjes. SpaceX lëshoi dy mjete zbarkuese private, të mërkurën, për të kryer kërkime për misionet e ardhshme njerëzore. Vetëm pesë vende; SHBA, Kina, India, Japonia dhe ish-Bashkimi Sovjetik kanë zbritur me sukses mjete në Hënë që nga vitet 1960. Udhëtimet private në sipërfaqen e hënës priten pasi misioni Artemis III i NASA-s, i planifikuar për mesin e vitit 2027, të bëjë uljen e parë me ekuipazh që nga fillimi i viteve 1970. Këto vizita dhe misione të tjera të financuara nga qeveria janë shkaku kryesor i shqetësimit për Fondin botëror të monumenteve. Ekziston një shqetësim i veçantë nga turizmi i ardhshëm, vecanërisht për sa i takon gjurmëve të lëna nga Neil Armstrong dhe Buzz Aldrin.