Ka shkuar në 90 numri i pacientëve që i janë drejtuar spitalit të Bulqizës me shenja helmimi. Ende nuk ka një arsye konkrete se çfarë mund ta ketë shkaktuar helmimin, pasi pacientët e dyshuar të helmuar nuk janë qenë të gjithë të një lagjeje apo fshati, por të shpërndarë në Bashkinë e Bulqizës. Prefekti i qarkut Dibër Nexhmedin Shehu u ka bërë thirrje banorëve mos ta përdorin ujin e pijshëm deri në përgjigje të analizave pasi dyshohet që mund të jetë uji i pijshëm shkaku i helmimit. Një tjetër arsye mendohen edhe virozat, por përgjigja do të behët e mundur pas përfundimit të analizave. Qytetarët janë paraqitur në spital me temperaturë dhe të vjella, dhe janë kryesisht të moshës 30-40 vjeç, por mes tyre ka pasur edhe fëmijë. Kjo është një ngjarje e përsëritur në Bashkinë e Bulqizës, pasi e njëjta situatë ndodhi edhe vitin e kaluar ku më shumë se 60 familjarë u paraqitën të helmuar në qendrën shëndetësore të Gjoricës, pas ndërhyrjes në rrjetin e ujit të pijshëm të fhsatit. Edhe vitet e shkuara janë shënuar në regjistrat e spitalit pacientë të helmuar për shkak të ujit të pijshëm. Policia njofton se ka ngritur grupin hetimor për të zbardhur rrethanat e për të përcaktuar shkakun e helmimit.