Koreja e Veriut po përgatitet të hedhë në erë rrugët që kalojnë përmes kufirit shumë të militarizuar me Korenë e Jugut, tha Seuli të hënën, mes një lufte deklaratash në përshkallëzim pasi Veriu akuzoi rivalin e tij për dërgimin e dronëve mbi kryeqytetin Phenian. Trupat e Koresë së Veriut po punonin nën kamuflazh në rrugët në anën e saj të kufirit pranë brigjeve perëndimore dhe lindore, dhe ka të ngjarë të përgatiten për të hedhur në erë rrugët, ndoshta që të hënën, tha një zëdhënës i Koresë së Jugut. Javën e kaluar, Ushtria e Koresë së Veriut tha se do të mbyllte plotësisht rrugët dhe hekurudhat me Korenë e Jugut dhe do të forconte zonat në anën e saj të kufirit, raportoi media shtetërore KCNA. Koreja e Veriut akuzoi të premten Korenë e Jugut për dërgimin e dronëve me materiale propaqgandistike kundër veriut mbi Phenian, në atë që e quajti një provokim politik dhe ushtarak që mund të çonte në konflikt të armatosur. Zyrtarët koreanojugorë nuk i janë përgjigjur pyetjeve të gazetarëve nëse ushtria e vendit apo civilët kanë dërguar dronë mbi penian. Gjatë fundjavës, Koreja e Veriut paralajmëroi për një "katastrofë të tmerrshme" nëse dronët e Koresë së Jugut do të zbuloheshin përsëri mbi Phenian. Të dielën, vendi i izoluar tha se ka vendosur tetë njësi artilerie plotësisht të armatosura në kufi "në gatishmëri për të hapur zjarr". Dy Koretë janë ende teknikisht në luftë pasi lufta e tyre e viteve 1950-53 përfundoi me një armëpushim, jo me një traktat paqeje. Lidhjet ndërkufitare janë mbetje të periudhave të afrimit midis vendeve, duke përfshirë një samit të 2018-ës mes liderëve, kur ata deklaruan se nuk do të kishte më luftë dhe se kishte nisur një epokë e re paqeje.