Tre të rinj janë arrestuar nga Policia e Korçës në një tentativë për shitjen e një sasie droge me qëllim shpërndarjen në juglindje të vendit. Në pranga kanë rënë dy të rinj banues në tiranë, përkatësisht 27 dhe 26 vjeç dhe një 25 vjeçar banues në Shëngjin. Policia thotë se këta shtetas u kapën në aksin rrugor "Prrenjas-Pogradec", duke qarkulluar një automjet me karroceri që drejtohej nga 26 vjeçari. Në karroceri ishte ngarkuar një automjet tip "Volkswagen", në bagazhin e të cilit, në vendin e gomës rezervë u gjet një sasi lënde narkotike hashash me peshë prej gati 6 kilogramësh. Po ashtu, gjatë kontrollit fizik të të rinjve, policia thotë se gjeti sërish lëndë narkotike. Burime nga policia e Korçës pohojnë se të rinjtë kanë deklaruar paraprakisht se drogën e kishin për përdorim vetjak. Veç drogës, policia sekuestroi edhe dy automjetet dhe katër telefona celularë.