Lituania dhe Polonia po përgatisin plane evakuimi në rast të një sulmi rus. Vilniusi dhe Varshava po zhvillojnë procedura, logjistikë dhe infrastrukturë, përfshirë rrugët e evakuimit përmes Korridorit të Suvalkit. I përshkruar si "thembra e Akilit" e NATO-s, Korridori i Suvalkit është një shtrirje prej rreth 96 kilometrash përgjatë kufirit midis Polonisë dhe Lituanisë, ku gjeneralët e NATO-s kanë frikë se Putini mund ta vërë në provë aleancën dhe se mund të shpërthejë një konflikt i plotë me Moskën. Ky korridor lidh enklavën ruse të Kaliningradit me Bjellorusinë, një aleate e Moskës. Nëse lideri rus i zhvendos forcat e tij nga Bjellorusia përmes këtij korridori drejt Kaliningradit, ai mund t'i izolojë Estoninë, Letoninë dhe Lituaninë nga aleatët e tyre në Evropën Qendrore dhe Perëndimore. Këto vende po punojnë për një marrëveshje dypalëshe që do të krijojë kuadrin për këto plane, njoftoi Qendra Kombëtare e Lituanisë për Menaxhimin e Krizave. Njoftimi vjen ndërsa Lituania po kryen stërvitje në mbarë vendin, përfshirë testime të procedurave të evakuimit në kufirin polako-lituanez. Rusia ka vënë gjithnjë e më shumë në provë vendosmërinë e NATO-s duke shtuar sulmet e kamufluara ndaj vendeve fqinje.